طالبات کو لیکر پٹنہ جارہی بس حادثے کا شکار، دو اساتذہ کی موت، 11 طلبہ زخمی

دہری آن سون، 17 فروری (وقت نیوز سروس)۔ روہتاس ضلع کے پرستھوا تھانہ علاقہ کے سوہسا کے قریب قومی شاہراہ 319پر طلبہ سے بھری بس حادثے کا شکار ہوگئی ،جس میں دو اساتذہ کی موت ہوگئی ،جبکہ پانچ اساتذہ اور 11 طلبہ شدید طور سے زخمی ہیں۔ پولیس کے مطابق تمام اساتذہ اور طلباء کا تعلق کیمور ضلع کے چین پور تھانہ علاقے کے مدھیہ ودیالیہ بدھونا کے ہیں۔ بس طلباء اور اساتذہ کو لے کر پٹنہ جا رہی تھی۔ واقعہ پیر کی رات 1:30 بجے پیش آیا۔ مرنے والوں میں ٹیچر پونیت کمار اور سمیت کمار شامل ہیں۔ ایس پی روشن کمار نے بتایا کہ بس حادثے میں دو اساتذہ کی موت ہو گئی، جبکہ پانچ اساتذہ اور 11 طلباء زخمی ہوئے۔ تمام زخمیوں کو علاج کے لیے سہسرام​​ صدر اسپتال لے جایا گیا۔ کل سات اساتذہ، 36 طلباء اور والدین بھی سوار تھے۔ ایس پی نے بتایا کہ دونوں لاشوں کو پوسٹ مارٹم کے لیے صدر اسپتال سہسرام ​​لے جایا گیا ہے۔